Isa ka lalaki ang pilason matapos ginlampusan sang shock absorber sang motor kag ginsumbag pa sang iya katimbang sang alas-12 sang kaagahon, Oktubre 20, sa Barangay San Pedro, Distrito sang Molo, Iloilo City.
Ang biktima ginkilala lamang sa alyas nga “Nonoy,” 29 anyos, soltero kag residente sang nasambit nga barangay, samtang ang suspek amo si alyas “Raul,” 20 anyos, residente sang Barangay South Baluarte, Molo.
Sa interview sang Bombo Radyo kay PCapt. Ryan Christ Inot, hepe sang Molo Police Station, iya ginpahayag nga nakainom sang makahulubog nga ilimnon ang biktima sang nagbinaisay ang duha.
Suno kay Inot, ginsunlog pa sang biktima ang suspek nga iya ini bun-on sang kutsilyo, nga amo ang ginaalegar nga nangin rason sang pag-init sang ulo ni alyas Raul.
Bangud sini, ginlampusan sang suspek ang biktima sang shock absorber sang motor kag ginsundan pa ini sang mga sumbag.
Ang biktima nakaagom sang pilas sa ulo kag gilayon nga gindala sa ospital para sa nagakaigo nga pag-atipan medikal.
Gilayon naman nga nadakpan ang suspek kag ginapabilin karon sa kustodiya sang Molo Police Station.
Posible nga mag-atubang sang kaso nga attempted homicide ang suspek, suno sa impormasyon nga nakuha.
Text by: Bombo Jay Panizales
