Nagapati si Vice Mayor Lady Julie Grace “Love-Love” Baronda nga nakulbaan ang mayorya sang City Council nga magduso siya sang ordinansa ukon resolusyon rason nga limitado na ang iya poder sa konseho.
Ginpahayag ni Baronda nga wala sang disbentaha sa Iloilo City ang isa ka “active,” “proactive,” kag “dynamic” nga bise alkalde nga nagapropose sang mga ordinansa kag resolusyon agud masolusyunan ang mga problema sang mga pumuluyo.
Ang pahayag ni Baronda may kaangtanan sa pag-adoptar sang Sangguniang Panlungsod sang DILG Legal Opinion No. 95, series of 2025 sa Internal Rules of Procedure (IRP) sang konseho.
Suno kay Baronda, indi dapat limitado sa pag-preside sang mga session ang papel sang bise alkalde, bangud mahimo man ini magpropose sang mga legislation, mag-sponsor sang mga ordinansa kag resolution, magpartisipar sa deliberasyon kag maghatag sang privilege speech.
Ginkwestyon man niya ang paglimita sa iya mga gahum, nga suno sa iya, mahimo makapugong sa paghatag sang mga solusyon sa mga problema sang siyudad.
“This is a very sad day for the City of Iloilo and first time in the history nga ginkuhaan poder sa konseho ang Vice Mayor sang siyudad,” pahayag ni Baronda.
Dugang pa niya, masubo nga bahin ini sang kasaysayan sang Iloilo City bangud para sa iya importante ang aktibo nga partisipasyon sang bise alkalde sa paghimo sang mga polisiya para sa kaayuhan sang mga Ilonggo.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
