Mangin una sa bilog nga pungsod ang Schools Division of Iloilo, pananglitan nga ma-integrate sa curriculum sang mga eskwelahan ang mga isyu may kaangtanan sa West Philippine Sea.
Sa interview sang Bombo Radyo Iloilo kay Leonil Salvilla, spokesperson sang Schools Division of Iloilo, ginpahayag sini nga nakabaton na sila sang go signal halin sa gobernador sang probinsya kag may pondo na nga gin-allocate ang Provincial Government para sa sini nga tikang.
Apang, sa karon, wala pa sila sang available nga mga learning resource materials nga mahimo magamit sa classroom.
Gani, target sang Schools Division of Iloilo nga makahimo sang classroom-ready learning materials agud magamit sang mga manunudlo kag estudyante sa pagtuon sang mga isyu may kaangtanan sa West Philippine Sea.
Samtang, nagasugod na man sila sa mga preliminary activities, lakip ang mga orientations kag trainings para sa mga manunudlo.
Paagi sini, ginatinguhaan sang Schools Division of Iloilo nga masiguro nga husto ang impormasyon nga itudlo sa mga estudyante parte sa mga isyu may kaangtanan sa West Philippine Sea.
Target sang Schools Division of Iloilo nga masugudan ang implementasyon sa labing madali nga tion, kag ginalauman nga makaumpisa sa sini nga tuig.
Text by: Bombo Glenette Delit
