ILOILO CITY- Ginapanan-aw sang Iloilo Provincial Health Office (IPHO) ang pagtaas sang kaso sang leptospirosis subong nga tig-ululan.
Suno kay Dr. Maria Socorro Colmenares-Quiñon, pinuno sang amo nga opisina, iya ginpahayag nga ang mamunog nga ulan kag pagbaha amo ang nagapalala sang paglapta sang leptospirosis.
Panugyan ni Quiñon sa publiko nga magsuksok sang protective gear kaangay sang boots ilabi na kun magtapak sa baha.
Base sa data sang Iloilo Provincial Health Office, humalin sang Enero tubtob Hunyo, may yara na sang 50 ka kaso sang leptospirosis apang mas manubo ini sang 60% kun ipaanggid sa 125 ka kaso sang amo man nga period sang 2023.
Nagapanguna sa may pinakamataas nga kaso sang balatian amo ang Leon nga may apat, ginasundan sang Alimodian, Cabatuan, Calinog, Janiuay, Miagao, Oton kag Tigbauan nga may tag-tatlo ka kaso samtang may tag-duha naman ka kaso sa Igbaras kag Lambunao.
Ang leptospirosis isa ka balatian nga tuga sang bacteria nga makit-an sa tubig nga kontaminado sang ihi kag higko sang ilaga, baka, kanding, kag mangin ido.
