Gin-anunsyo sang Israel nga napatay nila ang commander sang Hamas kadungan sang strike sa southern Gaza sang weekend apang indi maathag kun ano ang natabo sa major target sang atake nga amo ang military chief nga si Mohammed Deif.
Suno sa Israel Defense Forces, na-“eliminate” sang ila pwersa si Rafe Salama nga amo ang lider sang Khan Younis brigade kag deputy ni Deif.
Ginpahayag nga isa si Salama sa pinaka-suod nga associates ni Deif kag isa man sa masterminds sa pagpang-atake sa southern Israel sang Oktubre 7 nga amo ang nagresulta sa Gaza war.
Gina-verify pa sang militar kag ni Israeli Prime Minister Benjamin Netanyahu kun napatay ukon buhi pa gihapon si Deif.
Una na nga gin-report sang Ministry of Health sa Gaza nga sa amo nga strike sang Israel, nadalahig kag napatay ang 90 Palestinians kag masobra 300 ang nasamaran sa Al-Mawasi nga isa ka designated humanitarian zone.
Ini na ika-pito nga tuyo sang Israel nga patyon si Deif. Nagapangibabaw siya sa Most Wanted list sang Israel sa sulod na sang pila ka dekada kag siya man ang ginatudlo nga rason sang kamatayon sang madamo nga Israelis bangud sa suicide bombings.
