ILOILO CITY-Nagpaathag ang organizer sang Miss San Juan sa San Juan Molo, Iloilo City kasunod sang ginpa- Bombo sang isa ka iloy natuhoy sa ginapahayag nga pagpamulitika nga rason kun ngaa wala ginpili ang iya bata nga magtiglawas sang ila barangay para sa Miss SK (Sangguniang Kabataan) Molo apisar ini ang ginkoronahan nga Miss San Juan sa Molo, Iloilo City.
Sa interview sang Bombo Radyo kay Raymond Velez, iya ginpahayag nga siya mismo ang nakahibalo nga wala sang kasugtanan nga ang magdaug nga Miss San Juan amo ang maga-represent sang barangay sa Miss SK (Sangguniang Kabataan) Molo.
Gin-athag man sini nga ang iya gin-organize nga pageant ang indi konektado sa Sangguniang Kabataan sang San Juan nga nagasanto naman sa official statement nga gin-isyu sang Sangguniang Kabataan sang San Juan nga ginapamunuan ni SK Chairman Pepito John Dumayao.
Suno kay Velez, nagdako lamang ang problema bangud sa reklamo sang iloy nga si alyas “Maymay” nga indi ang iya anak ang ginpili nga mangin official representative sa pageant sa ila distrito.
Dugang niya, ginarespeto man niya ang desisyon sang SK Chairman nga magpili sang kandidata nga amo ang magatiglawas sang mga pamatan-on sang ila barangay.
