Nahimo na nga severe tropical storm si “Carina” samtang nagapabilin sa lokasyon sini sa ginabanta 385 kilometros sa nasidlangan sang Casiguran, Aurora.
Sandig sa 11 p.m. weather bulletin sang Philippine Atmospheric, Geophysical and Astronomical Services Administration (PAGASA), nakasaad man nga ginbatak na ang Wind signal no. 1 sa Santa Ana, Cagayan.
Dala sang bagyo ang kabaskugon sang hangin nga 95/km malapit sa sentro kag pagmadlos nga tubtub sa 115 km/h.
Base sa track forecast, magahulag ini nga weather disturbance sa direksyon nga pa-naaminhan naaminhan-nakatundan sa Philippine Sea kag magabaskog tubtub nga malab-ot ang typhoon category.
Gina-forecast man nga magguwa ini sa Philippine Area of Responsibility (PAR) sa Miyerkules sang gab-i ukon sa kaagahon sa Huwebes samtang nga nagahulag malapit sa mga isla sa Ryukyu archipelago.
Halin sa Huwebes, magahulag si Carina sa East China Sea kag pakadto ang direksyon sa southeastern China.
Sa pihak nga bahin, ang Habagat nga mas pabaskugon ni Carina ang ginalantaw nga magadala sang mabaskog nga pag-ulan sa mga lokalidad sa nakatundan nga bahin sang Luzon subong nga gab-i tubtub sa Miyerkules gani nga nagapaandam man ang state weather bureau sa posible pagluntad sang baha kag pagkatiphag sang duta. #
