Ginbuyagyag ni Senator Bong Go nga ginkakasan man siya sang security detail antes pa man ini natabo kay Vice President Sara Duterte.
Suno sa senador nga long-time aide ni former president Rodrigo Duterte, natabo ini sa iya ginabanta tatlo ka semana na ang nagligad.
“Hindi siya nagi-isa dahil unang-una, ako rin po ay natanggalan ng security. Mas nauna pa ako sa kanya. Siguro mga three weeks ago pa ito,” pahayag ni Go.
Ginpahayag sini nga nagakahangawa man siya bangud trabaho man niya bilang senador nga makalab-ot sa bisan diin nga parte sang Pilipinas kag may mga pamahog man sa ila nga kabuhi.
“Concerned rin po ako kahit papaano. Ako nga mismo senador, alam niyo ang trabaho namin ay kahit saang sulok po ng Pilipinas ay umaabot po ako. Nandiyan po kahit papaano yung risk, yung threats sa buhay namin. Pero ako naman sanay naman ako, kahit saan naman tayo naglalakad tayo,” dugang sini.
Wala pa sang ginpaguwa nga detalye si Go kaangot sa iya alegasyon, apang nagpahanumdom ini sa liderato kag sa hanay sang Philippine National Police (PNP) nga magpabilin sa ila nga ginsumpaan nga responsibilidad kag indi magpagamit sa anuman nga politikal nga agenda.
Pahayag pa sini, dapat nga mangin propesyunal ang pulis kag himuon lamang kun ano ang husto.
Sa pihak nga bahin, si Senator Ronald ‘Bato’ Dela Rosa naman nga kaalyado man sang mga Duterte ang nagpanawagan sa mga anay miyembro sang Armed Forces of the Philippines (AFP) kag PNP nga mag-boluntaryo sa paghatag sang proteksyon kay Sara bisan wala sang sweldo.
Sa Facebook post sang senador, ginpahayag sini nga “bayanihan lang” ang matabo sa mga gusto magdugang sa security detail sang bise-presidente.
Matandaan nga kahapon sang aga, Hulyo 29, nagpaguwa sang open letter si Vice President Sara para kay PNP Chief Police General Rommel Francisco Marbil kun sa diin ginpatpat sini ang bagay nga iya ginkadismaya lakip ang sulit-sulit nga pagpa-interview ni Marbil nga naga-mensyonar sa iya pangalan.
Ginsiling sang bise-presidente nga makatrabaho man siya nga wala sang security detail apang gindugang sini nga isa ka “political harassment” ang ginhimo ni Marbil nga pagkakas sang 75 ka mga pulis halin sa iya security detail.
Ginahulat pa ang mangin sabat sang PNP sa malawig nga open letter sang bise-presidente apang antes sini, nag-isyu na si Marbil sang direktiba nga i-rationalize ang deployment sang Police Security and Protection Group personnel para malab-ot ang police-to-population ratio nga 1:500.
