𝗕𝗥𝗔𝗭𝗜𝗟 — Kon masami, aton mabatian nga tawo lamang ang nagapositibo sa paggamit sang iligal nga druga.
Apang, sa isa ka tumalagsahon nga tion, nagpositibo sa cocaine ang mga pating sa baybayon sang Brazil.
Madugay na nga nagahambal ang mga manugpanalawsaw nga ang kabuhi sa dagat mahimo maapektuhan sang mga droga nga ginhaboy sa tubig sang mga smuggler, nga may tonelada sang cocaine nga makita sa palibot sang Florida, South and Central America.
Ang isa ka pagtuon gikan sa Oswaldo Cruz Foundation sa Brazil nakasapo karon sang ebidensya nga ang mga pating sa pagkamatuod apektado sang mga droga nga nagahigko sang kadagatan.
Gin-usisa sang mga siyentipiko ang 13 ka wild nga Brazilian sharpnose sharks nga ginbakal gikan sa magagmay nga mga sakayan sa pagpangisda, bangud ang mga species nag-uyang sang ila bug-os nga kabuh sa baybayon kag posible nga maapektuhan sang polusyon.
Gin-test ang muscle kag liver tissue gamit ang isa ka sulundan nga teknik nga ginatawag liquid chromatography nga may tandem mass spectrometry – sa diin ang mga molekula ginapain sa isa ka likido – sa pagpangita sang cocaine kag benzoylecgonine, ang panguna nga metabolite sa bulong.
Natukiban nga ang tanan nga 13 ka mga pating ang positibo sa cocaine, nga may konsentrasyon nga 100 ka pilo nga mas mataas sangsa ginreport sang una para sa iban nga mga tinuga sa tubig.
Ini ang una nga pagtuon sa pagpangita sang presensya sang cocaine sa mga free-range shark, kag natukiban nga ang substance mas lapnag sa tissue sang kaunuran sangsa mga atay sang pating.
Apang, ang pagtuon nagsiling nga ang patag sang pagpanalawsaw “tuman ka limitado” kag ang epekto sang cocaine sa kabuhi sa tubig indi pa bug-os nga nahibal-an.
Ang panalawsaw ginbalhag sa outlet nga Science of the Total Environment.
Nahibaluan nga sang Hunyo sang nagligad nga tuig, ang US Coast Guard nakakuha sang masobra 14,100 pounds (6,400 kg) sang cocaine sa Caribbean Sea kag Atlantic Ocean, nga may ginabanta nga balor nga $186 million ukon malapit P11 billion.
