Ginkabos ang world no.2 kag tiglawas sang Pilipinas nga si Ernest John “EJ” Obiena nga makabulsa sang medalya sa Paris Olympics 2024.
Sa 12 ka pole vaulters nga nag-qualify sa finals sang men’s pole vault, nagpang-apat lamang ang 28-anyos nga Pinoy pride matapos napaslawan ini nga ma-clear ang 5.95 meters sa iya tatlo gid ka attempts.
Apisar sang resulta sang hampang, daku ang nangin improvement sa performance ni Obiena ipaanggid sa ika-11 sini nga pwesto sang una ini nga nagpasakop sa Olympics sa Japan sang 2021.
Sa imbukada sang hampang sa Stade de France nga nagsugod 1:00 kaina sang kaagahon kag nagtakop pasado ‘las tres, nangin mahapos para kay Obiena nga ma-clear sang tag-isa lamang ka attempt ang kataason nga 5.50 meters kag 5.70-meters.
Sa ikatatlo na nga height nga amo ang 5.80-meters, natandog sini ang bar rason nga nagdesisyon ini kag si Coach Vitaly Petrov nga laktawan na lang amo nga kataason kag mag-diretso na sa 5.85m.
Na-clear sini ang amo nga height kag nakakuha man sang 5.90m clearances nga amo ang nagbutang sa iya sa maayo nga posisyon nga makakuha sang medalya.
Apat na lang kuntani sila nga nabilin sa kumpetisyon sang wala gid ini nagmadinalag-on nga ma-clear ang 5.95-meters sang tatlo ka beses.
Si Emmanouil Karalis sang Greeze ang nakakuha sang bronze (via countback) apisar pa nga pareho sila ni Obiena nga may 5.90 nga final clearances. Una nga na-eliminate ang Pinoy bangud wala ini nakalapaw sang tatlo ka beses sa 5.95 meters. Ini bangud man na-perfect ni Karalis ang iya una nga mga lukso sa tag-isa lang ka attempt (magluwas sa 5.90 mark) samtang si Obiena naman ang naka-miss sa nauna sini nga attempt sa 5.80.
Wala naman sang nakibot sang nadepensahan sang world number one nga si Armand “Mondo” Duplantis ang iya gold medal ilabi na bangud makit-an nga chill lang ini halin sa pamuno sang kumpetisyon.
Gin-reset man sini ang world kag Olympic records paagi sa pag-clear sang 6.25 meters.
Nagpangaduha naman sa kumpetisyon ang world no. 3 nga si Sam Kendricks sang USA (5.95 meters).#
