ILOILO CITY- Ginakabig sang Iloilo City Health Office nga alarming ang nagasaka nga kaso sang dengue sa siyudad matapos nalab-ot na ang alert threshold.
Ini matapos nga naglab-ot na sa 642 ang na-record nga kaso sang balatian.
Sa interview sang Bombo Radyo kay Dr. Roland Fortuna, Assistant City Health Officer, iya ginpahayag nga nakatalana i-activate ang hydration unit nga nakaplastar sa La Paz Maternity Clinic para sa mga mild cases.
Suno kay Dr. Fortuna, ginatun-an man ang pagbutang sang isa ka team nga para sa consultation nga ma-duty sang 24/7 para sa mga ginadudahan nga dengue cases.
Nahibaluan nga libre ang konsultasyon sa tagsa ka district health centers kaupod ang activated priority lanes para sa pasyente nga may amo nga balatian.
Kaangot sini, ginrrekomendar naman ni Fortuna ang pagsuksok sang long sleeves kag jogging panta sa mga estudyante kag ipaiway anay ang prescribed uniform agud makalikaw sa kagat sang lamok.
