ILOILO CITY – Nagbunga sang matam-is nga kadalag-an ang paghimakas ang duha ka mga graduates sang University of San Agustin College of Pharmacy and Medical Technology matapos nalakip sa topnotchers sa August 2024 Medical Technologists Licensure Examination.
Ini amo sanday Dovy Dichoson sang Dayao, Roxas City ,Capiz nga Rank 6 kag Kristia Madel Arabaca sang Buray, Oton, Iloilo nga Rank 8.
Sa interview sang Bombo Radyo kay Dichoso, iya gin-ako nga na-pressure siya nga makapasar sa pasinawan.
Suno kay Dichoso, wala siya nagalaom nga mangin topnotcher, sa diin gintugyan na lang sini sa Diyos ang iya kapalaran.
Nagahandom man ini sa ulihi nga mangin isa ka doktor rason nga nagkuha ini sang pre-med course.
Samtang, suno naman kay Arabaca, ginhimo sini nga inspirasyon ang pressure nga iya nabatyagan.
Ginpahayag sini nga antes ang pasinawan, nagbatyag ini sang kakulba, sa diin samtang nagapila ni sa testing site, naga-review pa ini.
Tuman naman ang kalipay sini bangud nakapasar ini sa pasinawan.
Kaangay man ni Dichoso, plano man sini nga mangin isa ka doktor.
