ILOILO CITY- Ginkumpirma sang Department of Health nga may na- detect na kag nakasulod na sa Pilipinas ang bag-o nga kaso sang mpox (ukon ginatawag sadto nga monkeypox).
Ini ang ikapulo na nga kaso sa kabilugan kag pinakauna nga kaso nga na- report humalin sang deklarasyon sang World Health Organization sang amo nga outbreak bilang “public health emergency of international concern.”
Suno sa ahensya, ang bag-o nga mpox case ang nakumpirma paagi sa laboratory testing.
Antes sini, ang pinakaulihi nga mpox case ang na- detect sang December 2023.
Suno sa DOH, ang tanan nga nauna nga kaso sang mpox ang isolated kag nakarecover na.
Ang bag-o nga mpox case naga-involve sang 33- anyos nga lalaki nga Filipino nga may travel history sa gwa sang Pilipinas.
Ang pasyente nagsugod sa pag-eksperyensiya sang sintomas masobra isa ka semana na ang nagligad, ginhilanat kag gintubuan sang rashes sa guya, likod, kag iban nga parte sang lawas.
Matapos ginhatagan ini sang medical attention sa isa ka government hospital, ang tests nagkumpirma sa presensiya sang mpox gamit ang polymerase chain reaction (PCR) test.
Ang sintomas sang Mpox ang tipikal nga nagalakip sang rash ukon mucosal lesions nga nagalawig sang 2 tubtob 4 ka semana nga may upod nga hilanat,sakit sang ulo, sakit sang likod, nagapalangluya kag nagabanog nga lymph nodes.
Ang virus nagalapta paagi sa close contact sa infected nga tawo, kontaminado nga mga materyales ukon infected ng sapat.
Ang habon kag tubig ang sarang naman makapatay sang virus.
Ginapanugyanan man nga maggamit sang gloves kun nagapanghugas sang kontaminado nga mga materyales.
