ILOILO CITY – Ginlaslasan sang secretary general sang Bayan Panay nga si Mr. Elmer Forro ang anay kadre sang Communist Party of the Philippines – New People’s Army (CPP-NPA) kag subong consultant sang National Task Force to End Local Communist Armed Conflict nga si Jeffrey Celiz.
Ini matapos ginpangalanan ni Celiz ang pila pa ka nabilin nga mga lider sang rebelde nga grupo nga mahimo magpadayon sa pagsabwag sang kalakasan sa Panay Kag Negros sa diin nalakip man ang pangalan ni Forro kag sang iya pamilya.
Ang pahayag ni Celiz ang kasunod man sang kamatayon sang pila ka mga high-ranking officials sang rebelde nga grupo sa natabo nga serye sang mga encounters sa Calinog kag Lambunao, Iloilo.
Sa interview sang Bombo Radyo kay Forro, iya ginpahayag nga lunsay kabutigan ang mga pahayag ni Celiz.
Suno kay Forro, nagakadapat nga untatan na ni Celiz ang Red-tagging bangud madamo na sang mga napatay bangud sini.
“Kun nag-NPA ako tani wala na ako nagbalik sa Bayan Panay. Kun NPA ka lagson ka gid naya.”
Ginpahanumdom man sini ang nangin desisyon sang Korte Suprema nga ang Red-tagging ang isa ka paandam sa kabuhi, freedom kag seguridad sa diin ginbase ini sa mga report sang United Nations Human Rights Council.
Ginpahayag ni Forro, nga nagapasipsip lang si Celiz sa Marcos administration agud mabawi ang iya kredibilidad.
Kun may matabo man nga malain kay Forro kag sa iya pamilya, ginpahayag sini nga wala na sang iban pa nga basulon kundi si Celiz.
“Nagakabalaka gid ako sa safety sang kabuhi sang akon asawa kag kabataan. Kun ano man ang matabo sa akon kag sa akon pamilya, ang may salabton si Jeffrey Celiz. Pati tae dilapan yana para lang mabuhi.”
