Gin-anunsyo sang Russia kag Ukraine nga nagbayluhanay sila sang tag-115 ka prisoners of war.
Natabo ini duha ka semana matapos ginsulong sang Ukraine ang Kursk region sa Russia kag samtang nga ginaplano naman sang Russia nga sakupon ang mas madamo nga east Ukrainian towns.
Gindungan man ini sa Ukrainian Independence Day kun sa diin nagpirma si Ukrainian President Volodymyr Zelenskiy sang mga layi batok sa Russia kaangay sang pag-ratify sa statute agud nga makasulod ang Ukraine sa mga myembro sang International Criminal Court (ICC).
Kadungan sang pagbayluhanay sang mga preso, pareho nga nagpasalamat ang Kyiv kag Moscow sa United Arab Emirates nga amo ang nagpatunga sa agreement.
Lakip sa 115 ka mga preso halin sa Russia suno kay Zelensky amo ang mga soldado halin sa National Guard, Armed Forces, Navy, kag State Border Guard Service.
Sa kumpirmasyon naman sang Russian defence ministry, 115 ka Russian servicemen nga napreso anay sa Kursk region ang nahilway na kag subong yara anay sa ila kaalyado nga pungsod nga Belarus kun sa diin nagabaton sila sang bulig nga “psychological-medical.”
Nahibaluan nga pila ka beses na nga natabo ang pagbayluhanay sang preso sa sulod sang duha ka tuig nga gyera sang Russia batok sa Ukraine.
