Naghingyo si Pope Francis sa mga tumuluo nga Katoliko nga ipangamuyo ang iya pagbyahe padulong sa Asya kag Oceania subong nga semana.
Subong nga adlaw magabiya sa Vatican ang Santo Papa para sa 12 ka adlaw nga byahe sa apat ka lugar nga amo ang Indonesia, Papua New Guinea, East Timor ukon Timor Leste kag Singapore.
Yara sa 33,000 km (20,500 miles) ang ma-cover sang sini nga byahe nga amo ang ginalantaw pinakamalawig nga apostolic trip sang subong 87-anyos na nga head sang Catholic Church.
Magluwas sa byahe, ginapreparahan man sini ang 16 ka mga speech nga iya i-deliver sa mga misa bilang pagpakita sang nagatubo nga Catholic community sa sini nga mga pungsod.
Sa Indonesia, natalana ini nga magpakigkita kay outgoing President Joko Widodo kag sa mga tiglawas sang dalagku nga relihiyon sa Istiqlal Mosque (nga amo ang pinakadaku sa Southeast Asia) kag magapirma man sa joint declaration kaupod sa grand imam nga si Nasaruddin Umar.
Ang Indonesia amo ang pinakadaku nga Muslim nation sa kalibutan apang ginakilala sini ang Protestantism, Catholicism, Buddhism, Hinduism kag Confucianism.
Ini nga byahe sa rehiyon amo ang iya-45 nga pagbisita sa abroad.
Una ini nga ginplano para sa 2020 apang wala nadayon bangud sa Covid-19 pandemic.
Sa sulod sang sini nga apat ka tuig, daku ang ginhina sa ikaayong lawas ni Pope Francis rason nga nagasakay ini sa wheelchair, nagpaidalom sa hernia surgery sang nagligad nga tuig, kag may yara man sang ginasuprer nga respiratory issues.
Ang katapusan sini nga byahe sa luwas sang pungsod ang natabo sa Marseille sa France sang September 2023.
