Ginlutos sang Olympic pole vault champion nga si Armand ‘Mondo’ Duplantis ang Norwegian 400m hurdler nga si Karsten Warholm sa 100m exhibition race sa Zurich, Switzerland.
Naglab-ot sa 10.37 seconds ang time ni Mondo, samtang natapos naman ni Warholm ang karera sa time nga 10.47 nga pareho nila nga ‘personal best.’
Ginpatigayon ang race sa Letzigrund Stadium kun sa diin natalana man sila nga mag-compete sa ila tagsa ka sports event sa Diamond League meeting subong nga semana.
“I’m pretty fired up. How could I not be?” pahayag ni Duplantis sang yara na sa finish line. “Stop playing with me!”
Wala naman sang kalain sang buot ang 28-anyos nga Norwegian athlete para sa pole vault legend sang Sweden.
“I got to give it to Mondo, he beat me, fair and square, so it was a great race,” pahayag sini. “He was out [of] the blocks fast. He was out really sharp.”
Sunod nga ginhatagan ni Duplantis si Warholm sang isa ka Sweden jersey agud suksukon sa karera sa 400m hurdles sa Diamond League.
Nahibaluan nga si Warholm ang isa ka 400m hurdles world record holder kag three-time world champion apang napaslawan ini nga madepensahan ang iya Olympic title nga nadag-an sa Tokyo 2020 sang nag-compete ini liwat sa Paris Games.
Kilala naman si Duplantis nga apisar sa iya edad nga 24-anyos pa lamang, nag-set sang 10 ka world records sa pole vault, umpisa sa height nga 6.17m sang 2020 tubtub sa 6.25m sa Paris 2024 kag 6.26m sa Diamond League sa Poland pagkasunod nga sinemana.
Sang high school pa lamang si Mondo, nakadalagan ini sa time nga 10.57 seconds suno sa Olympics.com. Una man ini nagpabutyag sang interes nga mag-compete sa sprint relays para sa Sweden magluwas sa pagpasakop sa pole vault.#
