Ginpasalig sang Philippine Red Cross Iloilo Chapter nga bastante pa ang suplay sang dugo nga ila masuplay sa mga ospital sa probinsya subong nga mataas ang demand bangud sa nagasaka man nga kaso sang dengue.
Sa interview sang Bombo Radyo kay Dr. Carlo Nolan Carrado, manager sang Western Visayas Regional Blood Center sang PRC-Iloilo, iya ginpahayag nga ang koleksyon sang talatapan ang nagikan sa nagapadayon nga mobile blood donation activities sa mga banwa kag syudad.
Magluwas diri, may partner organizations man ang opisina nga amo ang nagabulig sa ila para mapadamo ang mga donasyon nga dugo.
Apisar sang bastante pa nga suplay, nagapangagda si Carrado sa mga luyag mag-donate nga mahimo magkadto sa PRC-Iloilo center sa Bonifacio Drive, City Proper ukon magtambong sa blood donation activities nga gina-organisar sang local government units, private partners, kag hospitals.
Ginplastar sini ang pagkinahanglan sa whole blood, platelet concentrate, red blood cells, kag fresh frozen plasma.
Ang mga indibidwal edad 16-17 ang mahimo man nga makadonar sa kondisyon nga may consent halin sa ginikanan.
Dapat nga antes mag-donate, siguruhon anay sang donor nga makatulog ini sang walo ka oras, nakakaon sang pamahaw, nakainom sang bastante nga tubig, kag dapat nga nakalikaw sa alcohol kag pagpanigarilyo.
Target sang PRC-Iloilo Center nga malab-ot sa yearend ang 25,000 nga amo nga ila target nga ma-collect nga blood units.
Ginapanan-aw nga tuman nga kinahanglan ang blood donation sa Western Visayas ilabi na bangud as of press time, naglapaw na sa 18,000 ang na-rekord nga dengue cases sa bug-os nga rehiyon kun sa diin 42 na ang napatay.
