Ginapanindugan ni Senate Deputy Minority Leader Risa Hontiveros nga dapat sa Senate custody ipaidalom si dismissed Bamban, Tarlac Mayor Alice Guo matapos ini napabalik sa Pilipinas kasunod sang pagkaaresto sa iya sa Tangerang City, Indonesia.
“Dapat sa Senado muna siya i-detain para makaharap sa hearing sa Lunes. Ginagalang ko ang karapatan ng Judiciary na maglabas ng warrant pero ang Senado ang may pinaka-unang arrest warrant laban sa kanya,” suno sa press statement sang senadora.
Si Hontiveros amo gid ang nagatutok sa Senate hearings sa ginaalegar kahilabtanan ni Guo sa iligal nga Philippine Offshore Gaming Operator (POGO) hub sa Bamban tubtub nga nabukaran pati ang identity nga isa gali ka Chinese national nga si Guo Hua Ping.
Matandaan nga kahapon sang aga, Septyembre 6, sang nagkadto si Guo sa korte sa Tarlac apang wala ini nagpyansa sa duha ka kaso nga graft. Magalab-ot kuntani ang piyansa sa P180,000 apang suno sa iya legal team, mas nabatyagan ni Guo nga safe siya sa Philippine National Police (PNP) custody gani nga magapabilin siya sa Camp Crame.
Antes sina, may yara na kuntani sang arrest order ang Senado batok kay Guo apang indi na ini mapatinir sa detention center sang Senado samtang nga indi ini temporaryo nga mahilway sa kustodiya sang pulis.
Bangud sang lihok sang dismissed mayor nga indi magpiyansa, mangin kumplikado na ang proseso para sa Senado bangud kinahanglan gid sini ang approval sang korte sa kada tion nga kinahanglan sini paatubangon si Guo sa mga hearing.
“Ang Senado ang nag-trigger ng manhunt. Senate warrant ang bitbit ng ating law enforcement sa Jakarta,” suno naman kay Hontiveros sang ginpaathag sini nga sa ila dapat ikustodiya ang anay alkalde.
“Bakit po kaya Tarlac court ang nag-issue? At bakit siya dinala sa Tarlac? Hiniling ko na si Gen. [Roberto] Ancan ng OSAA (Office of the Sergeant-at-Arms) ay sumunod doon para mamonitor ang mga pangyayari doon,” dugang sini. “Ngayon kung si Guo Hua Ping ay di mag-piyansya, ibig sabihin mas gusto pa niya makulong sa PNP kaysa sa Senate. We need to ask why. Why does she want to be in a jail more than in the Senate detention facility?”
Sa order naman nga ginpaguwa kahapon, Septyembre 6, ginpahayag ni Capas, Tarlac Regional Trial Court Branch 109 Presiding Judge Sarah Vedaña-Delos Santos nga gina-grant sini ang request ni Senator Hontiveros nga tugutan si Guo nga magtambong sa hearing sang upper chamber sang Kongreso.
Ang amo nga korte nga naga-uyat sang kaso na graft batok kay Guo ang nagmandu man sa PNP nga dal-on si Guo sa Senate bangud ang former mayor ang naka-detain subong sa Custodial Center sang pulis sa Camp Crame sa Quezon City.
Suno sa korte, tuman ka importante ang inquiry in aid of legislation” sang Senado rason nga gin-grant sini ang request ni Hontiveros.
“Given the critical importance of the ongoing inquiry in aid of legislation, the Court grants the Senator’s request,” kabahin sa nakasaad sa order. “Wherefore, the accused Alice Guo alias ‘Guo Hua Ping’ is allowed to attend the scheduled public hearing mentioned above provided that strict protocol be observed.”
Nahibaluan nga magluwas sa kaso nga graft, may iban pa nga reklamo nga ginaatubang si Guo lakip ang qualified human trafficking, tax evasion, kag money laundering.
1:10 kahapon sang kaagahon, Septyembre 6, sang ginbalik si Guo sa Pilipinas matapos nadakpan sa Tangerang City, Indonesia.##
