Naga-demand sang transparency gikan sa Guimaras Electric Cooperative ang mga konsumidor sini.
Ini kasunod sang pagtaas sang sukot sa kuryente nga yara sa P17.65/kwh kag pinakamahal sa bilog nga Western Visayas.
Sa interview sang Bombo Radyo kay former Buenavista Mayor Eugene Reyes, iya ginpahayag nga natingala sila kun ngaa indi luyag sang nasambit nga kooperatiba nga ipakita ang kaundan sang supply agreement sa tunga sang power distributor kag power suppliers nga Green Core Geothermal Inc. (GCGI) kag Panay Energy Development Corporation (PEDC).
Suno kay Reyes, kun wala sang ginatago ang Guimelco, indi sini pag-idalok sa konsumidor ang impormasyon nga kinahanglan nila mahibaluan ilabi na sa matuod nga rason sang pagtimbuok sang rate sang kuryente.
Pahayag niya, kun amo ini ang pagpamalakad sang amo nga kooperatiba, mas pakamaayuhon nila nga iduso nga may magsulod nga bag-o nga power distributor sa probinsya kaangay sang MORE Electric and Power Corporation nga makahatag sang mas barato nga kuryente.
