Gin-report sang kampo ni anay US President Donald Trump nga may nabatian nga mga lupok sang pusil malapit sa iya nahamtangan sa Florida, Estados Unidos sang Amerika.
Natabo ini pasado alas dos sang hapon (Domingo, oras sa Florida) sa golf course nga Trump International Golf Club sa West Palm Beach sa amo nga state kun sa diin nagahampang sang golf ang 78-anyos nga Republican presidential nominee.
Base sa inisyal nga impormasyon, gilayon nga gindala si Trump sa isa ka hilway nga lokasyon bilang precaution. Safe ang iya sitwasyon subong suno sa Trump Campaign.
Nagpaguwa naman sang statement ang Secret Service sa X (formerly Twitter) nga naga-imbestigar ini sa isa ka “protective incident” kun sa diin involved ang former president. Ginpahayag man sang ahensya nga kaupod sini sa imbestigasyon ang Palm Beach County Sheriff’s Office.
Base sa preliminary stages sang police investigation, wala sang ebidensya nga si Trump ang target sang paglupok sang pusil. Wala man sang gin-report nga injuries (as of press time.)
Antes nagbalik sa Florida subong nga weekend, halin sa West Coast swing si Trump kun sa diin lakip sa iya ginkampanyahan amo ang Las Vegas kag may ginpatigayon man nga Utah fundraiser.
Suno naman sa White House, pagkatapos sang insidente, gilayon nga napahibalo sanday President Joe Biden kag si Vice President Kamala Harris.
Si Harris amo ang Democratic presidential nominee nga makasumpong ni Trump sa presidential elections sa Nobyembre.
Matandaan nga napilasan anay sa dulunggan si Trump sa isa ka attempted assassination sa Pennsylvania rally sang Hulyo.
