Duha ang pilason sa nagluntad nga shooting incident sa Barangay Ilaya Poblacion, Zarraga, Iloilo subong nga gab-i, Septyembre 16.
Ang mga biktima amo sanday Noel Madera, 49, negosyante kag residente sang Barangay Pasil, New Lucena, kag ang ginaalegar helper sini nga si Jake Susal, 25.
Base sa inisyal nga pagpangusisa, halin sila sa store sa banwa, nagsakay sa tricyle, kag pauli na kuntani sa New Lucena sang natabo ang insidente.
Sa interview sang Bombo Radyo kay Police Staff Sergeant Ivan Christian Saludares, imbestigador sa Zarraga Municipal Police Station, iya ginpahayag nga may pilas sa tiyan si Noel samtang may samad naman sa wala nga tiil si Jake. Conscious man ang mga ini sang gindala sa ospital sa syudad.
Kaupod man nila si Christine nga asawa ni Noel apang wala ini napilasan.
Sa inisyal nga impormasyon, ginaalegar nga may baisay pa nga natabo sa tunga sang riding-in-tandem suspects kag mga biktima antes ang pagpangluthang.
Matapos ang krimen suno kay Saludares, nagpalagyo ang mga suspek pakadto sa direksyon sang town proper.
Isa sa ginalantaw nga anggulo amo ang hold-up apang gina-imbestigaran pa ini sang kapulisan.#
