Nagboto ang member states sa United Nations agud pormal nga i-demand nga tapuson na ang pagpang-atake kag pagtinir sang Israel sa mga teritoryo sang Palestine.
Pananglitan indi ini magtuman sa sulod sang 12 ka bulan, may ginpaandam nga idagdag nga sanctions.
124 ang nagpabor, 14 ang nagpamatok, kag 43 naman ang nag-abstain sang ginpatigayon ang pagbinotohay.
Ini nga non-binding resolution sang United Nations General Assembly (UNGA) ang naka-base sa advisory opinion halin sa International Court of Justice (ICJ) nga nagasiling nga iligal ang pagsakop sang Israel sa amo nga mga teritoryo halin sang 1967.
Kun matandaan, ginpaguwa sang korte ang desisyon sang Hulyo kun sa diin ginsiling nga gina-abusuhan sang Israel ang ila status bilang occupying power kag makabig na nga iligal ang ila settlements sa West Bank kag East Jerusalem.
Ang pag-adoptar sini nga resolusyon ang natabo sinemana antes ang una nga anibersaryo sang pag-atake sang Hamas sa southern Israel sang Oktubre 2023 nga rason sang pagbalos sang Israel sa Gaza nga nagapadayon tubtub subong apisar sang linibo nga nagkalamatay.
Gintawag naman sang Palestine nga maragtason ang resolusyon samtang naakig naman ang Israel kag gintawag ini nga “cynical international politics.”
