Ginkumpirma sang Philippine National Police (PNP) nga may lead na sila kun sa diin nagapanago si anay presidential spokesman Harry Roque nga una na gintawag sang mga mamalidha nga “pugante” bangud sa pagpamalibad sini nga mag-submit sa contempt order sang Kamara.
Ini ang santo sa report sang tracker teams sang Criminal Investigation and Detection Group (CIDG) matapos nagpaguwa ang Quad Committee sang arrest order batok kay Roque.
“Ang lead na yun doon lang nag uumpisa and then ivavalidate and then kapag positive na mas maireveal natin ‘yun… Kahit papaano may pinag-umpisahan na tayo, mapag umpisahan na kami sa paghahanap na sa kanya since wala nga siya doon sa kanyang residence,” suno kay CIDG spokesperson Lt.Col. Imelda Reyes.
Indi pa subong masapubliko kun sa diin ang lokasyon sang anay opisyal.
“Nakita siya. Kailangan natin ng recording para malocate talaga so but as of now maganda naman (ang development) kasi may nakapag positive na nakakita sa kanya sa area that’s why vinavalidate natin,” dugang sini.
Nagpaandam man ang PNP nga manabat ang sin-o man nga magtago kay Roque.
“If ever naman na meron mag coddle sa kanya ay meron naman kaukulan kung mapatunayan natin ay yung obstruction of justice sakaling meron man,” dugang sini.
Una naman nga ginpahayag sang mga pulis nga sa Pilipinas gihapon ang former presidential spokesperson sandig man sa koordinasyon sang police force sa Bureau of Immigration (BI).
Sa separado naman nga interview sa Presidential Anti-Crime Commission (PAOCC), may impormasyon nga ulihi nakit-an si Roque sa isa ka resort sa naaminhan sang Luzon.
Matandaan nga una na nagpahayag si Roque nga indi siya magsungka tubtub nga wala pa sang desisyon ang Korte Suprema sa iya gin-file nga motion sa pagkwestyon sa legalidad sang arrest order sang quad committee.
Ini na ang ikaduha nga tion nga gin-contempt si Roque sa Kamara kun sa diin ang pinakaulihi nga rason amo ang pagpamalibad sini nga magpasa sang dokumento sa iya assets nga ginalantaw kuntani nga lyabe para mabukaran ang gina-alegar nga koneksyon sini sa iligal nga POGO.#
