Gin-nominate sang Partido Demokratiko Pilipino (PDP) sanday Senador Christopher “Bong” Go kag Ronald “Bato” dela Rosa kag ang aktor nga si Philip Salvador agud mangin kabahin sang ila senatorial lineup para sa 2025 midterm elections.
Kadungan ini sang national assembly sang amo nga partido kagab-i, Septyembre 20, sa Davao City kun sa diin yara man ang chairman nga si anay Presidente Rodrigo Duterte.
Gintumod man sang partido si Senator Robin Padilla bilang national campaign manager.
Nahibaluan nga madugay na nga kaalyado ni Duterte sanday Go kag Bato samtang abyan nila kag masami naga-upod sa mga event sang pulitiko si Salvador.
Sa amo man nga assembly, gin-anunsyo ang bag-o nga mga opisyal sang PDP nga amo ang masunod:
President: Sen. Robin Padilla
Executive Vice President: Davao City Mayor Baste Duterte
Vice President for Metro Manila: Vivian Velez
Vice President for Luzon: Phillip Salvador
Vice President for Visayas: Cebu City Mayor Michael Rama
Vice President for Mindanao: Sen. Bato dela Rosa
Vice President for International Affairs: Atty. Raul Lambino
Ginpirmahan man ang memorandum of agreement (MOA) kaupod ang Partido Reporma, Hugpong ng Pagbabago, Pederalismo ng Dugong Dakilang Samahan(PDDS), kag Mayor Rodrigo Roa Duterte National Executive Coordinating Committee (MRRD NECC).
Ini nga kasugtanan amo ang magahatag sang kinamatarong sa PDP nga batunon ang nominasyon sang iban pa nga posible nga kandidato halin sa iban nga partido tubtub sa October 8 nga amo ang pagsugod sang pag-file sang certificate of candidacy sa Commission on Elections (Comelec). #
(Photo: Bong Go)
