Balantayan na subong nga adlaw, Septyembre 22, ang pagsaka sa ring sang reigning Filipino world champion nga si Melvin Jerusalem agud depensahan ang iya World Boxing Council (WBC) minimumweight crown.
Hingalitan ni Jerusalem ang home advantage sa sambuwa batok sa challenger nga si Luis Castillo halin sa Mexico.
Ang Blow by Blow sang Manny Pacquiao Promotions ang may yara sang 14 ka undercards nga magasugod ala una karon sa hapon antes ang Jerusalem-Castillo main event nga ginabanta alas syete karon sa gab-i sa Mandaluyong City College.
Pareho nga knockout ang target sang duha sa ila pag-atubangay karon.
Wala sang gin-mensyonar si Castillo kun ano nga round sini matumba ang Pinoy boxer, apang ginsiling sini nga kumpyansa siya nga madala-pauli ang korona sa Mexico.
Wala sang kalutusan ang 27-anyos nga southpaw sa 21 sini ka hampang, may 13 ka knockouts kag isa ka draw kag ginalantaw man nga gamiton sini ang height kag reach advantage batok sa 30-anyos nga pambato sang Pilipinas.
Gamiton naman ni Jerusalem ang iya natun-an sang una nga tion sini nga gintinguhaan nga depensahan ang iya World Boxing Organization (WBO) mini flyweight belt sang 2023 apang nalutos.
Espesyal ang sambuwa sang duha bangud ini ang una nga world title fight sa Pilipinas sa sulod sang pito ka tuig.
Nahibaluan nga magluwas kay Jerusalem, ang nabilin na lamang nga reigning Filipino world boxing titlist sa boxing amo si Pedro Taduran nga naga-uyat sang International Boxing Federation (IBF) 105-pound crown.
Sa pihak nga bahin, lakip sa Blow-by-Blow card ang former world super flyweight champion nga si Jerwin Ancajas nga magasaka man sa crucial comeback batok kay Sukpraserd Ponpitak sang Thailand kasunod sang sixth-round bantamweight bout defeat batok kay Takuma Inoue sa Tokyo.
