Ginpakigbahin sang isa ka Ilongga nga manunudlo sa Estados Unidos nga kun ano kadamo ang natudlo niya sa iya mga esudyante sa eskwelahan, amo man kadamo ang iya natun-an sa iya propesyon kag sa iya kabuhi.
Sa interview sang Bombo Radyo kay Flora May Didugol,tumandok sang Barangay Camangay, Leganes, Iloilo kag isa ka English teacher sa Arizona, United States of America, iya ginpahayag nga antes siya nakalab-ot sa iya naagom nga kadalag-an subong, madamo man ini sang inagihan nga mga pagtilaw kag kabudlay.
Suno kay Didugol, naghalin siya sa isa ka pigado nga pamilya kag ini ang nangin inspirasyon niya agud maghandom sang dako kag lab-uton ini.
Ginpahayag niya nga bangud sa paghandom, nakalab-ot siya sa iban nga nasyon bangud sa iya propesyon.
Matapos nagtudlo sa Pilipinas, nagpadulong ini sa Thailand, amo man sa Vietnam antes nagdesisyon nga tilawan ang kabuhi sa Estados Unidos sang Amerika bilang manunudlo.
Ginpahayag niya nga bisan pa nga indi mahapos ini para sa iya, napun-an siya sang positibo nga panan-awan.
Sa subong, duha ka tuig na ini sa Arizona, USA kag masiling niya nga ini ang katumanan sang iya madugay nga ginpangabudlayan para sa iya kag sa iya pamilya.
Pila naman sa importante nga leksyon nga iya natun-an amo ang pagkamapainubuson sa pihak sang kadalag-an, indi mahadlok nga mag-isahanon, kag ang pagpati nga temporaryo lang ang mga problema basta may kaisog kag may pagsalig sa Mahal nga Diyos.
