Ginakabig nga dako nga kadungganan sang isa ka elementary teacher sa San Rafael, Iloilo nga nalakip siya sa mga manunudlo nga nagsulat sang guides para sa 2024 Matatag Curriculum sang Department of Education.
Sa interview sang Bombo Radyo kay Ma’am Hazel Bedoy-dela Cruz, Master Teacher II sang San Rafael Central Elementary School, iya ginpahayag nga nangin kabahin siya sa mga nagsulat sang guides para sa Edukasyong Pantahanan at Pangkabuhayan kag Technology and Livelihood Education para sa Grade 4 tubtob Grade 6.
Suno kay dela Cruz, indi matakos ang iya kalipay nga nahatagan sang mas madalom nga kahulugan ang iya propesyon bangud sa oportunidad nga ginhatag sa iya.
Pahayag niya, indi man nangin mahapos ini nga responsibilidad apang ginhatagan niya ini sang 100% nga dedikasyon ilabi na nga ang mga educational materials nga ini ang may tungdan nga dako nga papel para sa palaabuton sang mga kabataan nga nagaeskwela pa lang.
Para kay Ma’am dela Cruz, nagapati siya nga indi lamang siya kabahin sang maragtas sang Department of Education kundi sang istorya man sang mga estudyante nga may handom nga mangin madinalag-on.
Ang Matatag isa ka update sa Philippine education system nga nagatuyo nga mas mapaayo ang edukasyon halin sa kindergarten tubtob Grade 10 paagi sa pag-focus sa pagbasa, math, kag life skills.
Ini nagahatag man prayoridad sa mga abilidad nga kinahanglan sang kabataan para sa adlaw-adlaw nga pagpangabuhi.
