Nagdaog si Miss Universe 2018 Catriona Gray sa libel case nga iya ginpasaka batok sa isa ka entertainment editor kag isa ka writer sang 2020.
Ginkumpirma ini sang iya legal counsel nga si Atty. Joji Alondo nga nagpakigbahin man sang desisyon sang Regional Trial Court (RTC).
Ang respondents sa kaso amo ang editor sang Bulgar nga si Janice Navida kag reporter nga si Melba Llanera. Pareho sila nga nagguwa nga “guilty beyond reasonable doubt” kag ginpamatbatan sang minimum nga anum ka bulan kag isa ka adlaw nga pagka-preso.
Gintawag ini sang kampo ni Gray nga “moral victory” kag ginpasalamatan man ang beauty queen sa pagsalig sa iya mga abogado apisar nga indi man mahapos ang proseso.
“Thank you Cat for the trust you have reposed on us. The journey was not an easy tread but it is all worth it… This is not just a judicial win but a moral victory!” pahayag sang legal counsel sa isa ka Instagram post.
Matandaan nga gin-file ni Cat ang reklamo sang Hulyo 2020 sang gin-release sang Bulgar ang iya peke ukon gin-photoshop lamang nga topless photo kag madasig ini nga naglapta online.
Sa isa ka statement, nagdepensa si Navida nga ginproteksyunan man nila si Cat paagi sa pag-blur sang laragway kag wala man gin-release ang original picture.Natalana nga i-appeal sang duha ang desisyon sang RTC.
