Ginklaro sang National Security Council (NSC) nga may epektibo nga “counter intelligence efforts” ang gobyerno batok sa mga espiya sang iban nga mga pungsod nga naga-operate diri sa Pilipinas.
Suno pa kay NSC Assistant Director General Jonathan Malaya, indi lamang limitado sa People’s Republic of China-Ministry of State Security (MSS) ang intel sang Pilipinas kundi sa iban pa gid nga foreign spies.
Ini nga statement ang ginpaguwa matapos ginpresentar sa hearing sang House quad committee ang isa ka dokumentaryo sang English news channel nga Al Jazeera kun sa diin gin-feature ang isa ka Chinese gambling tycoon nga preso subong sa Thailand. Ini amo si She Zhijiang nga nag-claim nga isa siya ka agent sang MSS sang China kag na-recruit siya sang 2016 sang isa ka lalaki nga nakilala niya sa Pilipinas.
Suno kay She, nag-promisa ang lalaki nga buligan siya sa iya nga kaso sa kondisyon nga mag-trabaho siya bilang spy sang China.
Paagi sa iya custodian, naghatag si She sang access sa Al Jazeera para mabuksan ang pila ka files nga nagapamatuod sa iya alegasyon nga isa siya ka Chinese spy.
Sa mga dokumento nga ginpakita sini nakabutang pati ang pangalan ni Guo Hua Ping nga amo ang pangalan ni dismissed Bamban, Tarlac Mayor Alice Guo, nga anak ni certain Lin Wen Yi nga amo man ang Chinese nga nabuyagyag paagi sa Senate hearings sang ginabukad ang identity ni Guo.
Ini nga alegasyon ang ginpanginwala ni Guo sang nag-atubang na siya sa Kamara kag nagsiling nga maga-file siya sang kaso batok sa self-confessed spy.
Suno naman kay General Malaya, kinahanglan pa nila nga i-validate ang mga impormasyon nga ginpangbuya ni She, ilabi na bangud kwestyonable man ang kredibilidad sini bangud isa siya ka criminal kag leader sang international crime syndicate.
“The Philippines’ counter intelligence efforts are ‘not only against PRC MSS spies but also other foreign spies operating in the country’,”pahayag sini. “Regarding the documentary on self-confessed MSS agent She Zhijiang, we have yet to validate the information mentioned considering that the person is not entirely credible being a wanted criminal and leader of an international crime syndicate.”
Kinahanglan maghalong suno kay Malaya bangud posible nga isa ini ka disinformation operation.
“For all we know, this could be another disinformation operation. We have to tread carefully.”
Nagpamalibad naman si Malaya nga mag-komento sa isyu sang posible involvement ni Guo sa mga operasyon sang Chinese spies bangud na-file naman ang mga kaso-kriminal batok sa iya kag nagapadayon ang mga imbestigasyon sa iya iban pa nga iligal nga mga aktibidad.
Sa bahin sang Armed Forces of the Philippines (AFP), ginpahayag naman nga ginapatuman ang ila contingency plans sa tunga sang reports nga may naga-operate nga mga espiya sang iban nga pungsod sa Pilipinas.
“In the case of national security concerns, rest assured that the AFP will be performing our mandate, and of course, supporting in the investigation on how the AFP can be in aid of this,” kabahin sang statement sang armadong-kusog.#
