Nagdangop sa Bombo Radyo ang pamilya sang Overseas Filipino Worker sa Riyadh, Saudi Arabia matapos nga wala ini nakapauli sa ila balay sa Guimaras apisar nga sang Hulyo pa ini nag-abot sa Pilipinas.
Ang OFW amo si Josie Gallentes Babor, 29, residente sang San Miguel, Jordan, Guimaras.
Sa interview sang Bombo Radyo kanday Jolie kag Narcisa Gallentes, ginikanan ni Josie, ginpahayag sang mga ini nga sang Hulyo 23, antes nagpauli ang ila anak, nakatawag pa ini sa ila.
Apang suno sa ila, sang Hulyo 24 nga adlaw nga ginalauman nga magaabot ini sa Pilipinas, wala na ini nag-communicate kag indi naman ini ma-contact sang iya pamilya.
Sa subong, nagapangayo sang bulig ang pamilya agud nga makit-an ang ila himata.
Nahibaluan nga may tatlo ka kabataan ang OFW samtang ang bana naman sini ang nagatrabaho sa Iloilo City.
