Ginakabig sang Police Regional Office 6 nga maayo nga development ang liwat nga pagbukas sa imbestigasyon sa pagpatay kay retired police general Wesley Barayuga.
Si Barayuga ang ginpatay sang 2020 sang nagapungko ini nga board secretary sang Philippine Charity Sweepstakes Office (PCSO).
Sa interview sang Bombo Radyo kay Police Brigadier General Jack Wanky, iya ginpahayag nga nagalaum siya nga maangkon sang pamilya ni Barayuga ang hustisya.
Suno kay Wanky, siya mismo ang makapamatuod nga biktima lang ini sang sirkumstansya kag ginkontra nga ang kamatayon ni Barayuga ang naangot sa ginaalegar kahilabtanan sini sa illegal drugs trade.
Si Barayuga ang nagserbe nga hepe sang Iloilo City Police Office halin sang 2006 tubtob 2008.
Matandaan nga ginmando ni PNP chief Police Gen. Rommel Francisco Marbil ang reinvestigation kasunod sang congressional hearing kun sa diin gintudlo nga utok sa pagpapatay kay Barayuga amo sanday former PCSO General Manager kag former police officer Royina Garma kag anay National Police Commission (Napolcom) Commissioner Edilberto Leonardo.
