Nag-ako sa sala ang isa sa mga kaupdanan ni Pastor Apollo Quiboloy nga nakasuhan man sa Estados Unidos sang Amerika.
Ini amo si Marissa Duenas nga isa sa madugay na ginasaligan nga administrador sang Kingdom of Jesus Christ (KOJC).
Nag-plead ini nga “guilty” santo sa nakabutang sa plea agreement sa US Attorney’s Office for the Central District of California nga napetsahan sang Lunes, Oktubre 7 (US time.)
Ini nga 15 ka pahina nga agreement ang pirmado ni Assistant US Attorney Gregory Staples, Duenas, kag abogado ni Duenas nga si Atty. John Littrell.
Ginplastar nga isa ini ka “confession of conspiracy” kabaylo sang pila ka tikang nga mapahagan-hagan ang penalidad sa iya.
Nahibaluan nga isa si Duenas sa associates ni Quiboloy sa US nga na-indict sang 2021 sang federal jury sa California bangud sa nagkalain-lain nga criminal offenses lakip na ang sex trafficking by force, fraud, and coercion; sex trafficking of children; marriage fraud; fraud and misuse of visas; bulk cash smuggling; promotional money laundering; concealment money laundering; kag international promotional money laundering.
Natumod siya nga amo ang administrator sang operations sang KOJC kag isa man ka human resources manager sa US.
Ginatudlo man ini nga nakighimbon para nga magkomiter sang marriage fraud scheme kag naangot man sa mga aktibidad nga gin-organisar agud nga mag-solicit sang pondo para sa simbahan ni Quiboloy.
Si Quiboloy naman ang na-detain subong sa Pilipinas kag natalana nga paatubangon sa trial sa duha ka korte sa Pasig kag Quezon City bangud sa kaso nga sexual abuse of a minor, child abuse, kag qualified trafficking.
Sang nagligad nga Martes, naka-file pa ini sang iya nga certificate of candidacy para sa pagka-senador sa 2025 elections.
