Aprubado na sang Iloilo City Council ang hingyo ni Mayor Jerry Treñas nga tabunan sang abo halin sa coal-fired power plant nga gina-operate sang Panay Energy Development Corporation (PEDC) ang sanitary landfill sa Barangay Calajunan, Mandurriao.
Sa pinakaulihi nga sesyon sa konseho, unanimous ang mga konsehal sa pag-apruba sang committee report ni Councilor Ely Estante nga amo ang chairperson sang Committee on Public Service, Environmental Protection and Ecology.
Ang report nagarekomendar sang pag-approve sang request sang alkalde.
Una na nag-request si Treñas sa City Council nga magpasar sang resolution nga nagahatag sa iya sang otoridad nga magsulod sa memorandum of agreement (MOA) sa PEDC.
Ginhingyo sang alkalde nga gamiton ang abo bilang “cover system” agud mapahagan-hagan ang exposure sa contaminants sa landfill, buhinan ang air emissions, i-control ang mga sapat nga nagadala sang sakit, kag iban pa.
Sa idalom sang kasugtanan, magatampok ang PEDC sang kapin 40,000 cubic meters nga abo kada tuig sa amo nga landfill sa masunod nga tatlo ka tuig.
