Ginsugid sang apat ka tuig nga bata nga lalaki nga ang upod nila ang nagsirado sa ila sa kotse rason nga wala sila nakagwa kag na-missing sang ginabanta 20 ka oras antes nasapwan sa abondonado nga salakyan upod ang isa niya nga playmate.
Ang duha ka mga bata nga na-missing amo sanday John Ronald Linagad, 4, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Sa interview sang Bombo Radyo kay John Ronald, iya ginpahayag nga apat sila nga nagsulod sa salakyan apang sang ulihi ,duha na lang sila ni Camelle ang nabilin kag si certain Budi ang nag-lock sang pwertahan sang kotse.
Suno kay John Ronald, samtang yara sila sa sulod sang salakyan, ang ila gin-inom amo ang tubig-ulan kag natulugan man sila.
May yara man ini sang ginsiling nga si certain Cocomaco kag may aswang man suno sa iya nga nagtuga sang kahadlok sa ila kag ginsiling sang bata nga indi na sila magbalik sa amo nga salakyan.
