Wala ginhuna-huna sang kaupod sa balay sang mag-asawa nga Nodque sa Zarraga, Iloilo nga matapos sa isa ka trahedya ang pag-updanay sang duha.
Ini matapos ginpatay sang asawa ang iya bana samtang nagakatulog ini sa sofa paagi sa paglampos gamit ang dumbbell.
Sa amo nga insidente, ang biktima amo si Eduardo Nodque, 61 anyos, kag isa ka engineer samtang ang asawa sini amo si Mary Joy Nodque, 59-anyos, retired teacher.
Sa interview sang Bombo Radyo kay Nestor Villamin, iya ginpahayag nga maayo man ang pagtamdanay sang mag-asawa.
Gin-ako man niya nga ulihi naman iya nahibaluan nga may yara sang mental problem ang babaye nga Nodque apang wala gid nagsulod sa iya pinsar nga mapatay sang asawa ang iya bana.
Nahibaluan nga si Villamin ang ginbuligan sang mag-asawa nga makaeskwela kag ginkabig nila ini nga anak humalin pa sang Grade 3 pa lamang ini.
Si Villamin man ang nagabulig sa mag-asawa sa ila balay.
Sang natabo ang krimen, wala si Villamin sa balay sang mag-asawa bangud nagpuli ini sa ila balay.
