Ka-Bombo, ano ang imo nga dream job?
Kun halimbawa abi, may mga sirkumstansya nga natabo kag wala mo gid nahimo ang trabaho nga imo ginahandum, ano ang imo masarangan himuon para nga malab-ot ini?
Sa United Kingdom, may isa ka 19-anyos nga babaye nga madugay na nagahandum nga mangin doctor.
Nabun-ag siya sa Bulgaria kag subong nagatinir sa West London.
Wala siya naka-eskwela sa medical school, apang indi gid makuha sa iya pinsar ang iya nga handum gani isa ka adlaw, nagsuksok ini sang bayo nga pang-doctor, nagsuok man sang gloves, kag nagsulod sa Ealing Hospital kag naglakat-lakat nga daw isa man siya ka physician.
Sa bilog nga adlaw, nagpakilala ni nga si “Dr. Christina”, nagpangkuti ini sang medical instruments, nagpalapit pa sa ambulance kun may mag-abot, kag may ginbutang pa gani nga substance sa isa ka pasyente.
Wala gid sang nakamutik sa iya sa amo nga adlaw, gani kumpyansa siya nga mahimo niya ini liwat, gani nagbalik siya tatlo ka adlaw ang nagligad… kag may ginkabit na nga stethoscope sa iya liog.
Amo lang ina ugaling, sang nagpakita ini liwat sa ospital, didto na siya naaresto, ginkasuhan, kag ginpapanaogan sang sentensya nga 12 ka bulan nga probation kag 15 ka adlaw nga rehab activities.
Gin-ban man ini sa pagsulod sa National Health Service (NHS) facility magluwas lang kun may yara sang health emergency.
Naghagan-hagan ang sentensya sa iya bangud sa argumento sang abogado sini nga bata pa siya kaayo kag ang iya tuyo amo man lang nga malab-ot ang iya dream job nga mangin doctor.
Ginsiling man nga wala man siya sang nahimo nga malain sa iban nga mga tawo.
Nabukaran man sa imbestigasyon nga sang yara siya sa ospital, ginbulong sini ang pasyente nga naka-hospital arrest kag may duha pa ka pulis sa amo nga kuwarto.
Nakit-an man sa hospital CCTV footage nga may gingamit ini nga syringe nga may unod nga indi ma-identify nga substance nga amo ang iya gintublok sa pasyente apang maayo lang bangud wala man ini sang malain nga epekto.#
