Ginkumpirma ni Senate President Francis “Chiz” Escudero nga ginpili sang mga senador ang Senate Blue Ribbon Committee nga amo ang magpanguna sa imbestigasyon sang Senado sa war on drugs sang Duterte administration.
Suno kay Escudero, si Senate Minority Leader Aquilino “Koko” Pimentel III ang manguna sa Senate subcommittee probe bangud ang chairperson sang panel nga si Sen. Pia Cayetano ang masako pa samtang naka-recess ang senado bangud magapa-eleher ini liwat sa 2025 elections.
Naistorya naman ni Escudero sanday Senator Ronald “Bato” Dela Rosa kag Senator Christopher “Bong” Go kag gin-hingyo sa ila nga magpakig-angot sa subpanel kaangot sa mga testigo nga gusto nila imbitaron sa hearing.
Pahayag pa ni Chiz, ang Senate Committee on Public Accountability and Investigations (blue ribbon) ang ginpili nga mag-imbestigar bangud amo lamang ini ang may gahum nga makahimo sang motu proprio investigation samtang break sang Kongreso.
Paagi sini suno sa iya, mas makatutok man ang Senado sa deliberasyon sang ginaduso nga 2025 national budget kun mag-resume na ang Senate sa ila session sa Nov. 4, 2024.
Matandaan nga si Bong Go nga kaalyado ni former President Rodrigo Duterte ang nagduso nga magpatigayon man sang imbestigasyon sa Senado kaangot sa drug war bangud suno sa iya, may mga wala-sang-basehan nga mga akusasyon batok sa iya, kay Duterte, kag kay Bato sa hearing sang quad comm.
Una naman nga ginsiling ni Bato nga chairman sang Senate Committee on Public Order and Dangerous Drugs nga magalunsar ini sang motu proprio investigation sa war on drugs kag imbitaron sini ang former president. Ginakontra sang iban nga mamalidha ini nga plano bangud si Bato nga taga-Davao kag abyan ni Duterte amo man ang chief sang Philippine National Police sang ginpatuman ang drug war.
