Gin-activate na sang Office of Civil Defense (OCD) ang “Charlie” protocol nga amo ang pinakamataas nga lebel sang emergency preparedness sa pito ka mga rehiyon sa pungsod bilang preparasyon sa paglaslas ni Tropical Depression Kristine.
Lakip sa gintumod nga high-risk areas amo ang Cagayan Valley, Central Luzon, Calabarzon, Mimaropa, Bicol Region, Cordillera Administrative Region, kag ang Eastern Visayas.
Sa pihak nga bahin, ang “Bravo” protocol naman ang ginpasaka sa moderate risk regions nga nagalakip sang Ilocos Region kag Bangsamoro Autonomous Region in Muslim Mindanao (BARMM).
Nalakip naman sa low risk areas ang National Capital Region (NCR), Western Visayas, Central Visayas, Zamboanga Peninsula, Northern Mindanao, SOCCSKSARGEN, kag ang Caraga nga magasunod sa “Alpha” protocol.
Gin-assess man nga ang Davao Region (Region XI) ang wala ukon may manubo lamang nga risgo sa bagyo.
Sa record naman sang Mines and Geosciences Bureau, ginapahayag nga 21,213 barangays ang may risgo sa pagkatiphag sang duha kag pagbaha bangud sa bagyo.
Nahibaluan na sa October 21 5 p.m. bulletin sang DOST-PAGASA, ulihi nakit-an si “Kristine” sa lokasyon nga 760 kilometros nasidlangan sang Catarman, Northern Samar.
Ginalantaw nga mahimo ini nga tropical storm sa masunod nga 12 ka oras kag makalab-ot sa lebel nga severe tropical storm sa Miyerkules antes ang typhoon category sa Huwebes sang gab-i ukon sa Biyernes sang aga. Ginalantaw man nga maga-landfall ini sa northeastern portion sang Cagayan.
18 ka areas na ang napaidalom subong sa Storm Signal Number 1 bangud sa malain nga tiyempo.
Si “Kristine” amo na ang ika-11 nga bagyo nga nakasulod sa Philippine Area of Responsibility subong nga tuig.
