Magapadalagan na lamang si Pastor Apollo Quiboloy bilang independent senatorial candidate sa May 2025 mid-term elections matapos nga ang partido nga iya ginbutang sa pag-file sang iya kandidatura ang nagduso mismo sang petition para sa iya disqualification.
Sa sulat ni Quiboloy kay Commission on Elections (Comelec) Chairman George Garcia, ginsiling sini nga gina-revoke na niya ang iya “pagbaton” bilang nominee sang Workers and Peasants Party (WPP).
Suno sa iya abogado nga si Atty. Mark Tolentino, makasarang man si Quiboloy sa iya national campaign bisan wala sang political party nga nagasuporta sa iya.
Nahibaluan nga yara ang pangalan sang pastor sa inisyal nga lista sang Comelec sang 66 ka aprubado na nga senatorial aspirants para sa 2025 midterm elections.
Ini apisar nga ginpanginwala sang WPP nga miyembro nila si Quiboloy kag may “material misrepresentation” nga natabo bangud indi otorisado nga tawo ang nagpirma sa iya nga Certificate of Nomination and Acceptance (CONA).
Suno pa kay Garcia, gintugutan nila si Quiboloy nga magpasakop sa 2025 elections bangud wala man sang final ruling sa mga kaso-kriminal batok sa iya.
Nagapangatubang ini sang mga kaso nga child and sexual abuse kag qualified human trafficking kag napaidalom sa kustodiya sang Philippine National Police halin sang Septyembre.
Nahibaluan nga may away sa sulod sang partido sang WPP bangud may naga-claim nga presidente si Tolentino apang gina-claim man ini sang isa pa gid ka senatorial aspirant nga si Sonny Matula nga amo ang nag-mosyon nga ideklarar si Quiboloy nga nuisance candidate.
Suno kay Tolentino, nag-desisyon si Quiboloy nga i-revoke ang nomination bangud indi na sini gusto nga ma-involve sa intra-party dispute sang WPP.
Gin-claim man ni Tolentino nga madamo nga partido ang interesado nga kuhaon si Quiboloy bilang guest candidate sa eleksyon apang wala sini ginhingadlan kun ano ini nga mga political party.
