Naglab-ot sa 16 ka election-related incidents ang na-record sa maragtason nga una nga parliamentary elections sa Bangsamoro Autonomous Region in Muslim Mindanao (BARMM).
Suno kay PRO-BAR Regional Director Police Brigadier General Christopher Abecia, lakip sa mga insidente ang pagpangluthang, trapping incidents kag mga pagsigabong.
Base sa pinakabag-o nga data sang Commission on Elections (Comelec), apat ka tawo ang napatay samtang 19 ang nasamaran bangud sa amo nga mga insidente sa rehiyon.
Tatlo sa mga napatay kag 15 sa mga nasamaran ang nadalahig sa shootout sa Datu Usman Mampen school site sa Barangay Bagua 2, Cotabato City.
Isa pa ka tawo ang napatay samtang tatlo ang nasamaran matapos magluntad ang kagamo sa Pilot Central Elementary School sa Cotabato City sa diin nagbinayluhanay sang akusasyon sang election violence ang mga supporter sang magkasumpong nga partido.
Samtang, isa pa ka tawo ang nasamaran matapos maglupok ang improvised explosive device ukon IED nga iya ginadala.
Bangud sa mga insidente sang kasingki kag bangud may nadiskubrehan nga pre-shaded ballots, ginbutang sang Comelec en banc sa idalom sang Comelec control ang Cotabato City kag Maluso sa Basilan.
Ginpahayag man sang Comelec nga 36 sa 68 ka precincts sa Maluso ang nakompromiso matapos madiskubre nga ang mga balota sa mga apektado nga precincts may yara na sang pre-shaded ukon may naka-shade na nga daan nga mga pangalan.
Apisar sini nga mga insidente, ginakabig sang Philippine National Police (PNP) kag ni Comelec Chairman George Garcia nga “generally peaceful” ang eleksyon sa rehiyon.
“At present, we can say that our elections are generally peaceful. However, unfortunate incidents did occur—especially here in Cotabato City. We are saddened by this. We condemn such incidents, particularly those that resulted in the deaths of our fellow citizens,” suno sa poll body chief.#
