Gintawag nga tanga sang regional director sang Department of Public Works and Highways Region 6 ang Metro Pacific Iloilo Water.
Ini bangud sa ginkutkot nga buho sang Metro Pacific Iloilo Water sa idalom sang Ungka flyover nga nagtuga sang kabalaka sa publiko.
Sa interview sang Bombo Radyo kay Engr. Sanny Boy Oropel, regional director sang ahensya, sa pagkamatuod, nangayo sang permiso sa ila ang Metro Pacific nga maga-excavate bangud may kay-uhon nga buho.
Apang suno kay Oropel, wala ini ginhimos sang Metro Pacific matapos ang ila pagkay-o sang tubo.
Kagab-i, ginhatagan niya ang Metro Pacific sang isa ka oras nga kay-uhon ang ginkutkot nga area kag kun mapaslawan, indi niya pag-aprubahan ang tanan nga excavation works sang amo nga water distribution company.
Kasunod sang paandam ni Oropel, gilayon naman nga nagpatigayon sang backfilling works ang MPIW.
Nagpangayo man ini sang pasaylo bangud sa huol nga natuga sa publiko sang ila ginkutkot nga buho.
