Nakabati na kita sang indi kinaandan nga mga istorya sang mga lalaki nga naga-duloble ukon naga-triple ang asawa apang wala man sang problema bangud nagakasugot man sila sa ila arrangement.
May iban man nga sugot nga buslanay lang sila sa ila nobyo kag friends pa gani sila tanan.
Apang paano naman kun dululungan kamo nga ginatunto tapos sa isa ka lugar lang kamo tanan ginapa-istar?
Amo naman ini ang istorya sang isa ka Chinese nga lalaki nga nakipag-relasyon sa lima ka mga babaye kag ginpapuyo tanan sa isa lamang ka housing complex nga lipod sa ila ihibalo.
Ini nga lalaki amo si Xiaojun, pigado, wala nakatapos sa pag-eskwela, kag anak sang isa ka bathhouse attendant kag isa ka construction worker.
Indi siya kuntento sa iya status sa kabuhi gani nagsugod siya sa pagpakuno-kuno nga manggaranon.
Una sini nga nainto si Xiaojia. Nahulog ang buot sini sa lalaki bangud sa iya luxury items nga regalo nga lunsay man gali peke.
Nagpakasal sila kag nagbusong pa gani si Xiaojia apang sang ulihi, nadiskubrehan sini nga indi gali manggaranon ang iya bana.
Ginpalayas niya ini kag nagdesisyon nga mangin isa na lang ka single mother.
Wala gani isa ka semana, may naintuan na naman ang lalaki kag ini amo si Xiaohong nga nakilala niya paagi sa online game.
Ginpahulam siya ni Xiaohong sang P1 million bangud sa iya rason nga gamiton niya sa pagkaayo sa ila future home, apang likom sa ihibalo sang babaye, gingamit ini sang lalaki para ipabilin ang iya pagpakuno-kuno nga rich siya nga tawo.
Sang nagbusong ang babaye, nag-renta sila sang lugar sa building kun sa diin yara man ang iya una nga asawa.
Nagpadayon ang buluhaton sang lalaki kag nag-angkon sang relasyon sa university students nga sanday Xiaomin kag Xiaoxin kag nurse nga si Xiaolan kag palareho sila nga nag-istar sa isa lang ka residential complex apang indi sila kilalahay.
Kada isa sa ila ang nahulaman sang P122,900; P81,900; kag P65,500 sa lain-lain nga rason nga ginpapati sang lalaki.
Nabuking lamang ini sang nagsukot na ang estudyante nga nobya bangud ibayad na niya sa tuition fee.
Ginbayaran ini sang lalaki gamit ang counterfeit nga kuwarta nga ginsulod sa bag apang gilayon ini nga nadiskubrehan sang babaye.
Didto na kag ginreport ini sa pulis, nagsugod ang imbestigasyon, kag nabukaran ang tanan sini nga ginhimo pati sa iya una nga asawa nga inosente gid sa tanan nga mga hitabo kasunod sang ila pagbulagay.
Presuhon ang lalaki sa sa sulod sang siyam ka tuig kag walo ka bulan kag pabayaron man sang P983,700 bangud sa sala nga fraud, bigamy, kag theft.#
