Patay ang 35-anyos nga lalaki matapos ginbuno sang iya live-in partner sa Brgy. Dagami, Maasin, Iloilo.
Ang biktima amo si Alyas Ron,35-anyos, samtang ang suspek amo si Alyas Tintin, 48-anyos, pareho nga residente sang nasambit nga lugar.
Sa interview sang Bombo Radyo kay Police Lieutenant Cyrone Empedrad, Deputy Chief sang Maasin Municipal Police Station, iya ginpahayag nga bag-o natabo ang insidente, nag-inom- inom pa sang makahulubog nga ilimnon ang duha upod ang ginatudlo ginapangimunan sang suspek nga pakaisa man lang sini.
Suno kay Empedrad, nagpauli una ang pakaisa sang suspek kag sang kaagahon na, natalupangdan sini nga wala na ang live-in partner gani gilayon ini nga nagkadto sa balay sang iya pakaisa.
Dugang pa sang natungdan, naabtan sang suspek nga nagapanuktok ang iya live-in partner sa balay sang iya pakaisa nga ginapangimunan,rason nga nagkuha ini sang kutsilyo kag ginbuno ang biktima.
Ginbawian gid sang kabuhi ang biktima matapos nakaagom sang patal nga pilas sa iya tiyan.
Yara subong sa Maasin Municipal Police Station ang suspek kag posible pasakaan sang kaso nga murder.
