Ginkumpirma sang Iloilo City Engineer’s Office nga wala pa ma-turn over sang kontraktor ang tatlo ka mga pump stations sa syudad sang Iloilo.
Sa interview sang Bombo Radyo kay Joel Gerasmia, Chief of staff sang Iloilo City Engineer’s Office, iya ginpahayag nga isa sa mga pump stations nga ini ang nahamtang sa Brgy. Maria Clara, isa sa Jalandoni Estate, Lapuz kag isa sa Calajunan, Mandurriao.
Suno kay Gerasmia, may yara sang naga-function nga pump station sa Muelle Loney apang may diperensya ini humalin pa sang ginturn-over ini sang Department of Public Works and Highways.
Naga-function man ang pump station sa General Luna, City Proper.
Ginpahayag niya nga ang problema amo nga may mga outfall nga indi masiraduhan kun nagataob kag nagasulod ang tubig sa drainage gani kinahanglan pa nga i-pump liwat agud ibalik sa suba.
Nagalaum naman sa Gerasmia nga ma-turn over na ang iban nga pump stations agud nga magamit na sang syudad.
