Nagapati man bala ikaw sa second chances?
Willing ka bala nga magbalik liwat sa imo anay kahagugma pagkatapos sang inyo breakup?
Ano man ang imo nga sabat, may ginasiling sa kanta nga “love moves in mysterious ways” kag siling nila, kun para kamo sa isa kag isa, magatabuay gid liwat ang inyo banas.
Pareho gid ina sa natabo sa mag-asawa didto sa Utah, USA nga sanday Jenna kag Mitchell Brotherson nga may indi kinaandan nga love story.
Malawig man ang relasyon sang duha, apang sadtong Pebrero 2020, nagsugtanay sila nga mag-break kag indi na lang pagpadayunon ang ila pag-updanay.
Sang nagpauli si Jenna, puerte ang iya hibi bangud daw nagatalang-talang siya nga wala na sang nobyo.
Pagkaaga naman, naglakat naman si Mitchell kag nag-ski.
Samtang naga-enjoy sa skiing, gintinguhaan sini nga mag-flip, apang sala ang iya landing, nag-una gid ang iya ulo, kag naangkon sang bad concussion.
Ang concussion amo ang mild traumatic brain injury nga nagaapekto sa pag-function sang utok kag bangud sini nagalingin ang ulo sang pasyente kag may mga hitabo nga indi niya madumduman ukon ang ginatawag nga amnesia.
Istorya pa ni Jenna, matapos ang aksidente, nakabaton siya sang text message kag tawag halin kay Mitchell nga nagapasugat ini sa ospital.
Bisan nagalibog ang ulo ni Jenna, ginsugat niya ini apang natingala pa gid siya nga pagkasunod nga inadlaw, sige-sige ang chat ni Mitchell kag ginahagad siya nga mag-date sila.
Tubtub sa spring break, adlaw-adlaw siya nga ginapangita ni Mitchell kag didto nga nakit-an liwat ni Jenna kun ano ini ka-thoughtful kag na-realize niya nga palangga pa niya ini.
Sang siya na ang nagprangka nga gusto sini nga magbalikanay sila, nakibot man si Mitchell nga break na gali sila.
Didto naathagan nga ang ila breakup ang parte gali sang mga hitabo nga nalipatan sang lalaki bangud sa iya naangkon nga brain injury.
Nagbalikanay sila kag Agusto sang amo man nga tuig, nag-propose si Mitchell kay Jenah sa Salt Lake City sa Utah.
Pagka-Septyembre, didto na kag nagpakasal sila sa amo man nga state.
Apat ka tuig na ang ila malipayon nga kabuhi bilang mag-asawa kag subong isa naman ka mommy si Jenna.#
