𝗜𝗟𝗢𝗜𝗟𝗢 – Magasugod na sa Nobyembre 15, 2024 ang closed season sa Visayan Sea.
Sa interview sang Bombo Radyo kay Remia Aparri, director sang Bureau of Fisheries and Aquatic Resources Region 6, iya ginpahayag nga magalawig ang closed season tubtob Pebrero 15, 2025 sa diin hugot nga dumilian ang pagpangisda sang mga sardines, herrings kag mackerels sa Visayan Sea.
Katuyuan sini suno kay Aparri nga maka-replenish ang mga isda.
Mga tuloy, tamban, tabagak, balantiyong, guma-a, bulao, kag hasa-hasa, ang mga klase sang isda nga dumilian nga hulikon.
Gina-engganyo naman ni Aparri ang mga commercial kag municipal nga mga manugpangisda nga magpahuway anay sa pagkuha, pagbaligya kag pag-market sang amo nga mga isda sa sulod sang na-established nga boundaries.
Ang delineation sang Visayan Sea nga sakop sang closed season ang nagaumpisa sa Danao River sa Escalante City sa Negros Occidental tubtob sa tip sang Sta. Fe, Cebu.
Magapadayon ini sa northernmost tip sang Madridejos, Cebu tubtob sa Gigantes Island sa Carles, Iloilo kun sa diin ang lighthouse ang magaserbe nga marker kag maga-konekta ini horizontally sa Olotayan Island tubtob Roxas City.
Sa tunga naman sang Iloilo kag Negros Occidental, magasugod ang boundary halin sa Talisay River sa Barotac Nuevo tubtob sa Tomonton Point sa EB Magalona kag sa ulihi, balik sa Danao River.
