Nag-preparar ang Office of Civil Defense (OCD) sa posible nga “worst-case scenario” sa tunga sang paglaslas ni Super Typhoon Pepito nga may international name nga Man-Yi.
Suno kay OCD administrator Undersecretary Ariel Nepomuceno, mas maayo nga magsobra sangsa magkulang ang pagpanghanda sang Pilipinas sa sini nga bagyo nga pang-apat na nga nakasulod sa Philippine Area of Responsibility subong nga Nobyembre.
9:40 kagab-i, Nobyembre 16, sang nag-landfall ang super typhoon sa Panganiban, Catanduanes kag gina-forecast nga magatabok pa sa pila ka mga probinsya sang Luzon halin Sabado sang gab-i tubtub sa Lunes sang aga.
Suno sa OCD, potensyal ini nga makaapekto sa 10-million ka mga tawo ilabi na sa Luzon areas.
Bangud sini, ginpadasig sang national government ang disaster response measures lakip na ang pre-emptive kag forced evacuation sa mga residente sa manubo nga mga lugar kag sa coastal towns amo man ang paghulag sang search and rescue teams, equipment, kag relief supplies.
Ginklaro man sang OCD nga ang ila gin-project nga 10-million ka mga tawo ang nagalakip na sang mga residente nga una naapektuhan sang anay Tropical Storm Ofel kag Severe Tropical Storm Kristine.
Ini nga estimated figure amo ang mangin basehan sang ila pagplano kun paano maka-responde samtang may bagyo.
Lakip sa ginaplastar nga dapat himuon amo ang pagpanagtag sang food packs, hygiene kits kag medical supplies sa mga rehiyon nga labi nga apektado.
May yara man sang 13,800 nga mga personnel halin sa Armed Forces of the Philippines, Philippine National Police, Philippine Coast Guard, Bureau of Fire Protection kag iban pa nga concerned agencies nga mangin parte sang 1,282 search, rescue kag retrieval teams sa bilog nga pungsod.
Naka-standby ang mga ini sa Ilocos Region, Central Luzon, Cagayan Valley kag sa Cordillera Administrative Region (CAR).
May duha man ka Black Hawk helicopters, duha ka Navy ships kag 73 rubber boats halin sa military ang ginpanghanda na para sa humanitarian missions santo sa report sang OCD.
Magluwas pa ini sa inventory nga gin-request man sa Department of the Interior and Local Government kaangot sa rubber boats sang local government units (LGUs).
Handa naman ang Enhanced Defense Cooperation Agreement (EDCA) sites para sa humanitarian assistance operations.
Base sa 2:00 am weather bulletin sang PAGASA, ulihi nakit-an ang sentro ni Pepito sa coastal waters sang Caramoan, Camarines Sur.
Dala sini ang kabaskugon sang hangin nga 185 km/h malapit sa sentro, pagmadlos nga tubtub sa 280 km/h, kag nagahulag sa direksyon nga pa-nakatundan naaminhan-nakatundan sa kadasigon nga 10 km/h.
Magapabilin ini bilang super typhoon ukon magnubo-nubo bilang typhoon samtang yara sa Aurora.
Gina-forecast nga sa buwas sa aga ukon sa hapon pa magaguwa sa Philippine Area of Responsibility si Pepito.#
Photo: St. Andrew the Apostle Parish
