Ginaduso ni Senate Energy Committee Chairperson Erwin Tulfo ang kooperasyon sa United Arab Emirates (UAE) para sa pagpatukod sang isa ka strategic oil storage facility nga magapabaskog sa suplay sang gatong sa Pilipinas.
Sa ginpatigayon nga bilateral meeting sadtong Oktubre 29 sa Abu Dhabi, nakig-hinun-anon ang delegasyon sang Pilipinas, sa pagpanguna ni Tulfo, sa mga tiglawas sang Abu Dhabi National Oil Company (ADNOC) agud nga talakayon ang plano nga proyekto.
Suno kay Tulfo, makabulig ang pag-angkon sang oil storage facility sa pungsod agud nga mabuhinan ang epekto sang pabag-o bag-o nga presyo sang gatong agud masiguro ang nagakaigo nga suplay sini sa pungsod.
Nagpahayag naman sang kahandaan nga magabulig ang United Arab Emirates sa proyekto.
Nahibaluan nga sa subong, naga-supply ang Abu Dhabi National Oil Company sang ginabanta 40, 000 bariles sang gatong .
Target nga pagatukuron ang proyekto sa second quarter sang 2027, nakadepende sa mangin kasugtanan ang nahanungod sa lokasyon, imprastraktura, galastuhon kag iskedyul sang pagpatukod sini.
Magluwas diri, ginatun-an man sang duwa ka pungsod ang pagpasangkad sang kooperasyon sang suplay sang krudo, investment sa mga refinery, renewable energy kag pagpasangkad sang gas-to-power projects.
