Magalibot si Miss Universe Philippines Chelsea Manalo sa Asya kag magaupod sa official trips sang Miss Universe organization matapos gindeklarar nga labing-una nga Miss Universe Asia.
Natapos na ang pageant kahapon sang aga, Nobyembre 17, apang sa press conference kaupod ang pila ka executives, gin-anunsyo ang apat ka continental queens halin sa 125 ka mga kandidata nga nagpasakop sa long-running beauty pageant sa Mexico City.
Ini nga queens ang may kaangay man nga trabaho sa reigning Miss Universe bangud magaserbe sila bilang ambassadors para sa mga kontinente nga yara sa ila title.
Magluwas kay Chelsea nga iya sa Asia, si Matilda Wirtavuori sang Finland ang continental queen sa Europe and Middle East; si Tatiana Calmell sang Peru ang continental queen sa Americas; kag si Chidimma Adetshina sang Nigeria ang continental queen for Africa and Oceania.
Ang Nigerian queen amo man ang first runner-up kay newly crowned Miss Universe Victoria Kjær Theilvig sang Denmark. Pananglitan indi ma-obra ni Victoria ang iya duties, si Chidimma amo ang magabulos sa title.
Big win naman ini kanday Tatiana kag Chelsea nga nangin suod nga mag-abyan sa pageant bangud roommates sila samtang yara sa Mexico.
Sang nabaton ni Chelsea ang sorpresa nga titulo, ginasuksok pa sini ang feathered tiffany evening gown nga himo sang Bulacan native nga si Manny Halasan nga wala maayo napakita sa stage bangud tubtub lamang sa Top 30 ang pambato sang Pilipinas.
Matapos ginkilala ang continental queens, naghatag man sang teaser ang Miss Universe Organization nga ang 2025 edition sang pageant ang posible nga patigayunon sa India, South Africa, Thailand, Costa Rica, Dominican Republic, Spain, Argentina, ukon sa Morocco.#
